„Ég er með áfallastreitu og líður illa ef ég kem nálægt þessum stað. Ég er mjög ósátt við vinnubrögðin og varð fyrir ofboðslegum vonbrigðum með stjórnendur SAK og að þetta sé gæðavottað sjúkrahús. Síðasta ár hjá mér fór í verki og mikla vanlíðan,” segir Málfríður Stefanía Þórðardóttir en hún varð fyrir læknamistökum á Sjúkrahúsinu á Akureyri. Málfríður er ljósmóðir og fyrrverandi starfsmaður sjúkrahússins.

Þetta kemur fram á vef RÚV en fjallað verður um málið í þættinum Kveiki í kvöld.

Hún leitaði til læknis vegna kvilla sem hafði hrjáð hana lengi. Í aðgerðinni varð hún fyrir áfalli og í dag er hún 100% öryrki. Málfríður segir að útlit sé fyrir að skorið hafi verið á vöðva í aðgerðinni og hún þannig orðið fyrir skaða. Hún varð líka fyrir miklu andlegu áfalli í aðgerðinni vegna þess að nemi fékk að vera viðstaddur hana án hennar leyfis. Þá var henni ekki kynnt hvernig aðgerðin yrði framkvæmd.

„Ég held ég verði bara að segja það upphátt: Ég var bara með hægðaleka. Ég þurfti að ganga með bleiu á þessu tímabili, 45 ára gömul kona með bleiu.”

Málfríður gagnrýnir að fólk á landsbyggðinni hafi ekki aðgang einhvers konar umboðsmanni sjúklinga til að aðstoða fólk þegar það telur að mistök hafi orðið.