Daniil Istomin er hárgreiðslumeistari frá borginni Novosibirsk í suðurhluta Síberíu. Honum leiddist hinar hefðbundnu aðferðir sem kollegar hans hafa notað í gegnum aldirnar og ákvað þess í stað að nota öxi.

Í viðtali við Russian Times sagðist hann hafa viljað finna upp einhverja nýja og athyglisverða aðferð. „Fyrst prófaði ég með bundið fyrir augu, síðan með báðum höndum. Að lokum kom að öxinni.“ Hann sagðist ekki hafa þurft mikla aðlögun og notar bara grunnlögmál rúmfræðinnar. Öxina notar Istomin bæði til stórverka og fínni snyrtinga og í dag finnst honum verkfærið þægilegra heldur en skæri og greiður.

Myndband sem fylgdi fréttinni hefur vakið mikla athygli. Þar er sýnt þegar Istomin snyrtir hár konu sem virðist dauðhrædd um líf sitt. Hamfarirnar eru slíkar að hann hefur fengið viðurnefnið „hinn síberíski Sweeney Todd“. Sagan um Sweeney Todd er 19. aldar flökkusaga frá Lundúnum um rakara sem myrti viðskiptavini sína.

Hipsterar meitla skegg sitt með öxi

Istomin er ekki að finna upp hjólið (eða öxina) með aðferð sinni því að hipster-karlmenn á vesturlöndum láta í síauknum mæli snyrta hár sitt og skegg með öxi. Sú aðferð er þó töluvert ólík aðferð Istomin. Lamið er á litla handöxi eða sveðju með hamri til fínni snyrtinga, líkt og hárið sé meitlað til.

Í viðtali við Men´s Health segir einn hipster: „Axar-rakstur er mjög svipaður og hefðbundinn rakstur, en samt mun karlmannlegri.“

Axar-rakstur má rekja til fjórða og fimmta áratug síðustu aldar þegar axar-sölumenn sýndu skógarhöggsmönnum og öðrum áhugasömum vörur sínar. Til þess að sýna gæðin rökuðu þeir einhvern djarfan sjálfboðaliða.