Lögreglan á Suðurnesjum hafði hendur í hári ökumanns sem ók allt of hratt í umdæmi lögreglu um helgina. Bifreiðin mældist á 134 kílómetra hraða þar sem hámarkshraði er 90 kílómetrar á klukkustund.
Ökumaðurinn þarf að greiða 150 þúsund krónur í sekt, að því er segir í skeyti frá lögreglunni á Suðurnesjum.
Nokkrir til viðbótar voru kærðir fyrir hraðakstur í umdæminu og fáeinir til viðbótar gerðust brotlegir við umferðarlög með öðrum hætti, svo sem með því að stinga af frá umferðaróhöppum.
Þá urðu nokkur umferðaróhöpp í umdæmi lögreglu um helgina. Í einu tilvikinu rákust saman jepplingur og flutningabifreið á Garðbraut, en sem betur fer urðu ekki slys á fólki.
Þá varð árekstur á hringtorgi á Reykjanesbraut þar sem ökumaður virti ekki biðskyldu við hringtorgið en ók viðstöðulaust inn á það og hafnaði á bifreið sem var þar fyrir. Ökumenn sluppu við meiðsl.
