Snorri Ingimarsson, fyrrverandi forstjóri Krabbameinsfélagsins, er látinn, 71 árs að aldri. Hann lést í Reykjavík þann 14. ágúst síðastliðinn. Greint er frá láti hans á vef Krabbameinsfélagins. Þar segir meðal annars:

„Snorri var mjög áhugasamur um krabbamein og krabbameinsfræði og lét sig mjög varða málefni þeirra sem greinast með krabbamein, bæði hér á landi og á alþjóðavettvangi. Lífsgæði fólks sem greinist með krabbamein voru honum hugleikin og í þeirri umfjöllun var hann einn af frumkvöðlunum hér á landi. Heimahlynning, sem nú þykir sjálfsögð þjónusta, var stofnuð að hans tilstuðlan.

Snorri flutti fjölda erinda um krabbamein og málefni þeim tengd, þýddi rit og skrifaði og miðlaði til lærðra og leikra, bæði sem fagmaður og af eigin reynslu.“

Vefur Hringbrautar greinir einnig frá láti Snorra og segir hann hafa verið einn fremsta lækni þjóðarinnar. Snorri var vakinn og sofinn í baráttunni gegn hinum mikla vágesti sem krabbamein er og lagði sig fram um að vinna að nýjum lausnum í baráttunni gegn sjúkdómnum. „Hann innleiddi ný sjónarmið og meðferðarúrræði í heilbrigðiskerfi Íslendinga sem hafa orðið til að bæta hag sjúklinga til muna. Alla ævi var hann boðinn og búinn að liðsinna öðrum, í starfi snerist það um lækningar og hjúkrun, lina þjáningar og bæta heilsu,“ segir í greininni á Hringbraut.

Snorri nam læknisfræði í Kaupmannahöfn og krabbameinslækningar voru sérgrein hans. Árið 1991 sneri hann sér að geðlækningum og starfaði sem sérfræingur á geðdeild Landspítalans frá 1994 til 2000. Eftir það var hann sjálfstætt starfandi geðlæknir.

Snorri var einn af stofnendum Styrks, samtaka krabbameinssjúklinga og aðstandenda þeirra.

Útför Snorra fór fram í Hallgrímskirkju í dag.