Áslaug Arna Sigurbjörnsdóttir, þingmaður og ritari Sjálfstæðisflokksins, segir Kristjón Benediktsson fara með rangt mál í pistli sem hann birti á Facebook-síðu sinni um helgina og vakti nokkra athygli. Áslaug er ósátt við hann og segir hann leggja sér orð í munn.

Í færslu sinni sagði Kristjón að Áslaug hefði nýlega hitt eldri mann, burðarstoð í Sjálfstæðisflokknum og öflugan grasrótarmann.

„Þessi ágæti maður lýsti áhyggjum af núverandi stöðu mála. „Mér gæti ekki staðið meira á sama hvað þér finnst“ ….þetta er svarið sem hann fékk. Hann sagði mér þetta sjálfur; þetta er frá fyrstu hendi,“ sagði Kristjón sem bætti við að maðurinn hafi verið sár.

„Hann var allt að því klökkur, honum fannst þetta svo leiðinlegt að flokkurinn hans væri kominn í þessa stöðu. En þetta orðaval hennar er víst í miklu uppáhaldi hjá henni. Kannski er þetta allt hvítvínið með humrinum.“

Áslaug Arna svarar Kristjóni fullum hálsi í færslu á Facebook-síðu sinni.

„Þetta hef ég aldrei sagt við nokkurn mann. Ég get ekki rætt þetta við Kristjón á hans facebook vegg og deili þessu því hér. Það er ekkert að málefnalegum ágreiningi og gagnrýni en ég dreg mörk við ósannindi. Ég veit ekki hvor þeirra á sök á þeim, Kristjón eða þessi meinti máttarstólpi í Sjálfstæðisflokknum, en í það minnsta er þetta hér með leiðrétt. Kveðja Stúlkukindin.“