Talið er að á annað hundrað þúsund manns hafi mætt í miðborg Reykjavíkur á Menningarnótt en 141 mál var skráð hjá lögreglunni, þar á meðal fimm líkamsárásir en hermt er að þær hafi allar verið minniháttar. 

Í tilkynningu lögreglunnar segir að Menningarnótt hafi farið að mestu leyti vel fram en eftir kl. 19:00 hafi meiri ölvun gert vart við sig meðal gesta. Eitthvað var um mál sem snéru að barnaverndarlögum, meðal annars vegna barna sem lögregla þurfti að hafa afskipti af og og þá var nokkuð hellt niður af áfengi hjá ungmennum sem ekki höfðu aldur til að drekka. Átta manns gistu fangaklefa lögreglu í nótt vegna ýmissa brota.

Í tilkynningu Reykjavíkurborgar segir að gestir hafi nýtt sér þjónustu Strætó og að umferð hafi gengið greiðlega strax eftir flugeldasýninguna.