Dagur B. Eggertsson borgarstjóri segir að það ljóst að nauðsynlegt sé að ræða stam og aðra málhelti. Hann segist orðlaus yfir því að fullorðið fólk geri grín að nýjum seðlabankastjóra fyrir að stama. „Í vikunni tók við nýr Seðlabankastjóri, Ásgeir Jónsson. Þetta er mikilvægt embætti og eðlilegt að ræða kost á löst á viðkomandi. Ég get þó ekki orða bundist yfir því hvað margir leggja lykkju á leið sína til að gera lítið úr Ásgeiri vegna þess að hann stamar,“ skrifar Dagur á Facebook.

Hann bætir við að bróðir hans, Gauti B. Eggertsson, hafi stamað. „Ég ólst upp við það að Gauti bróðir stamaði. Mjög illa. Frá frumbernsku man ég eftir kvíðanum og angistinni sem fylgdi þessu og ég man eftir umræðum við foreldra okkar um mikilvægi þolinmæði, bíða, ekki grípa frammí og ekki gera óþarfa mál úr þessu. Það þurfti varla að hafa orð á því að stíðni eða háð væri útilokað. Ég gat hins vegar orðið mjög reiður ef ég fann fyrir háði eða stríðni í garð bróður míns út af þessu. Stamið eltist af honum og ég veit fyrir víst að Ásgeir hefur með mikilli vinnu unnið mjög úr sínu málhelti,“ segir Dagur.

Dagur segir enn fremur að knattspyrnumaðurinn Heiðar Helguson sé fyrirmynd hvað þetta varðar. „Síðar á ævinni hef ég kynnst því að margt kjarkmesta fólk sem ég hef kynnst hefur þá reynslu að hafa þurfti að glíma við stam. Ég vona að Heiðar Helguson knattspyrnumaður fyrirgefi mér að ég nefni hann sem sérstaka fyrirmynd í þessu efni. Við þurfum greinilega að ræða stam og málhelti meira sem samfélag og bið allt fullorðið fólk að hugleiða þessi orð. Ef við krakkarnir gátum tekið tillit og sýnt stuðning fjögurra, fimm ára gömul, hljótum við öll að geta gert það. Ásgeiri óska ég til hamingju með mikilvægt og vandasamt starf og lýsi þeirri von að hann verði farsæll Seðlabankastjóri,“ segir borgarstjóri.