Leit að belgískum ferðamanni, Björn Debecker, sem talinn er hafa fallið í Þingvallavatn hefur enn engan árangur borið.

Í skeyti sem lögreglan á Suðurlandi birti á Facebook í hádeginu kemur fram að björgunarsveitarmenn hafi leitað í vatninu í gær og notað við þá leit fjarstýrðan kafbát með myndavél.

„Kafbáturinn var settur út á völdum stöðum þar sem dýpi er á bilinu 30 til 50 metrar og fengust nokkuð góðar myndir af þeim svæðum en sjónsvið bátsins er um 40 metrar. Leit var hætt upp úr kl. 20:00 í gærkvöldi án árangurs. Svæðisstjórn og lögregla mun funda á miðvikudagsmorgun, annarsvegar til að fara yfir þær aðgerðir sem þegar hefur verið farið í og hinsvegar skipuleggja leit með öðrum kafbáti sem stefnt er að því að nota á fimmtudaginn.“