Tónlistarkonan Lady Gaga sást í kossaflensi með hljóðmanninum Dan Horton á veitingastaðnum Granville í Studio City í Kaliforníu síðasta sunnudag. Lafðin og Dan fengu sér dögurð á milli kossa og kíktu síðan yfir á veitingastaðinn Lemonade til að fá sér nokkra drykki.
Lafðin hefur ekki sést á stefnumóti síðan hún sleit trúlofun við umboðsmanninn Christian Carino í febrúar. Þau byrjuðu saman snemma árs 2017, trúlofuðu sig um sumarið það sama ár en ballið var búið snemma á þessu ári. Þær fréttir komu í skugga sögusagna um að Lady Gaga og leikarinn Bradley Cooper ættu í ástarsambandi, en þau léku eftirminnilega saman í myndinni A Star is Born.
Nýi maðurinn í lífi Lafðinnar er raunar ekkert svo nýr af nálinni þar sem hann vann með söngkonunni í nóvember í fyrra þegar hún tróð upp í Las Vegas. Dan er reynslubolti í bransanum og hefur unnið með stjörnum á borð við Bruno Mars, Justin Timberlake og Jay-Z. Þá hefur hann einnig unnið við kvöldþátt Jimmy Fallon og tónleika Glee-hópsins.
Dan er fráskilinn, en hann kvæntist leikkonunni Autumn Guzzardi í mars árið 2013. Autumn sótti um skilnað í febrúar í fyrra og gekk hann í gegn í maí. Dan og Autumn áttu engin börn saman.
Dan vissi greinilega nákvæmlega hvers konar athygli hann fengi eftir ástríðufullt stefnumót við Lafðina um helgina því strax í kjölfarið lokaði hann Instagram-reikningi sínum þannig að aðeins fylgjendur hans geta fylgst með honum.