Breski fjölmiðilinn the Independent greinir frá því að íslenska leiðsögufyrirtækið Tröllaferðir hafi sagt tilvonandi ferðamanni til Íslands, Jenny Skates, að hún gæti ekki farið í ferð með félaginu þar sem Bretland væri ekki lengur í Evrópusambandinu.

The Independent birtir skjáskot af samskiptum Skates við Ingólf Axelsson, eiganda leiðsögufyrirtækisins, þar að hann segir henni að hún verði að bíta í það súra epli, eða einfaldlega „tough luck“. Ingólfur hefur vakið athygli undanfarin ár fyrir að hafa ítrekað reynt að klífa Everest-fjall.

Ingólfur kom af fjöllum þegar DV spurði hann um umfjöllun Independent, þrátt fyrir að vitnað sé í hann í greininni. „Þetta bara passar ekki. Þetta er útúrsnúningur. Það er verið að reyna að berja á okkur einhvers staðar, ég veit ekki alveg hver. Það er verið að reyna að skemma okkar mannorð. Ísland er utan Evrópusambandsins svo ég skil ekki alveg hvernig við ættum að vera á móti einhverjum utan Evrópusambandsins. Þetta er mjög skrítið mál. Það er smá lykt af þessu eins og það sé verið að koma einhverju á okkur. Við höfum allt okkar á hreinu og bjóðum alla velkomna. Þetta er að öllum líkindum einhver starfsmaður sem er óánægður,“ segir Ingólfur.

Í grein Independent er haft eftir Skates að hún hafi í fyrstu talið að Ingólfur væri að grínast. Hún bendir honum á að Bretland sé enn í Evrópusambandinu en fékk ekkert svar. The Independent hafði samband við Ingólf og hefur blaðið eftir honum að hann hafi ætlað að slá á létta strengi og gera grín af Brexit, úrgöngu Breta úr Evrópusambandinu. Hann fullyrðir að Skates hafi sent skilaboðin utan skrifstofutíma.