Á fyrstu fimm mánuðum þessa árs greindust 727 einstaklingar með klamydíusýkingu, þar af 329 karlar og 398 konur. Þetta kemur fram í Farsóttafréttum Embættis landlæknis.

Þá greindust 56 einstaklingar með lekanda á sama tímabili, 49 karlar og 7 konur, og 19 með sárasótt, 17 karlar og tvær konur.

„Athygli vekur að lekandi og sárasótt halda áfram að sækja í sig veðrið og greinast einkum hjá karlmönnum. Eins og áður hefur verið bent á eru þessir kynsjúkdómar frábrugðnir klamydíu hvað varðar kynjahlutfall en konur eru í meirihluta sem greinast með klamydíu,“ segir í frétt Farsóttafrétta.

„Ef árangur á að nást til að draga úr fjölda kynsjúkdóma þarf að fækka rekkjunautum, nota smokka við kynmök, leita sem fyrst til læknis við grun um kynsjúkdóm svo hægt sé að hefja meðferð sem fyrst og stytta þannig þann tíma sem viðkomandi er smitandi. Unnið er að aðgerðaráætlun til að bregðast við útbreiðslu kynsjúkdóma.“

Þá kemur fram að níu einstaklingar hafi greinst með HIV-sýkingu, þar af sjö karlar og tvær konur. Allir þessir einstaklingar eru af erlendu bergi brotnir. „Klamydíusýkingar eru með lægra móti um þessar mundir miðað við árin á undan og HIV-sýkingar greinast einkum meðal útlendinga. Margir af þeim sem greinast við komuna til landsins eru með þekkta HIV-sýkingu og eru þegar komnir á meðferð áður en þeir koma.“