Sex fastráðnum kennurum var sagt upp við MR í vor og fimmtán lausráðnir kennarar fengu ekki áframhaldandi starfssamning. Undanfari uppsagnanna var starfshæfismat sem lagt var á alla kennara skólans, í þremur þáttum, þar sem menntun vó 40%, starfsreynsla 30% og aðrir þættir, flestir huglægir, mynda 30%. Þær Sigríður Helga Sverrisdóttir og Linda Rós Michaelsdóttir telja að stjórnendur skólans hafi notað þennan síðasta hluta matsins til að draga niður þá kennara sem þeim er persónulega í nöp við, eða hafa dirfst að gagnrýna stjórnunarhætti í skólanum, og þessi vinnubrögð geri matið að skrípaleik. Nokkrir undirliðir eru undir þessum þriðja lið, þar á meðal samskipti og samvinnuhæfni. Sigríður Helga bendir á að þar séu kennarar sem hún sakar um einelti látnir leggja mat á samskiptahæfni hennar, auk stjórnenda sem hafi ráðist harkalega að henni.
„Þetta fólk er allt vanhæft til að leggja mat á samvinnuhæfni mína; þarna eru samkennarar úr enskudeildinni sem lögðu mig í einelti og rektor og konrektor sem reyndu að bola mér frá störfum í haust,“ segir Sigríður Helga en hún kom illa út úr þessum undirlið. Einnig kom hún illa út úr undirlið sem kallast „Viðmót og þjónusta“. Hún telur þar vera um hreinan tilbúning að ræða.
„Við hverja töluðu þau eiginlega þegar þau könnuðu viðmót mitt og þjónustulund? Ég gæti nefnt marga nemendur og samstarfsmenn sem bera mér vel söguna hvað þetta varðar.“ Enn einn undirliðurinn er kennslumat nemenda en þar segist Sigríður Helga hafa verið í meðallagi. „Ég tel að 16 til 17 ára nemendur hafi varla þroska til að meta hæfni kennara og hef horft upp á hvernig þessar kennslukannanir eru notaðar af sumum nemendum til að kvarta undan kennurum sem þeim þykja vera of strangir,“ segir Sigríður Helga.
Sigríði Helgu Sverrisdóttur var sagt upp störfum við MR í vor í kjölfar langvinnra átaka. Lindu Rós Michaelsdóttur var gert að fara á eftirlaun.
Þessi frétt er brot úr lengra viðtali við þær Sigríði Helgu og Lindu Rós sem birtist í prentútgáfu DV í dag þar sem þær fara yfir þær ólgu sem þær telja vera í MR.
