Sprite Zero Klan hefur vakið mikla athygli undanfarin misseri, en hljómsveitin hélt uppi stemmingunni á loftlagsverkfalli sem fram fór um hádegisleytið í gær. DV náði viðtali við Daníel og Kolbein, meðlimi hljómsveitarinnar, sem tjáðu sig um mótmælin

Kolbeinn segir: „Það var mjög mikið um unga krakka, þetta er auðvitað baráttan um framtíð þeirra. Við erum 20 og 21 árs gamlir en flestir sem mættu voru enn yngri, vegna þess að loftslagsbreytingarnar munu bitna á þeim og í rauninni okkur öllum.“

Vilja að fólk vakni

„Dagurinn í dag er nefnilega mjög merkilegur, þetta gæti bara verið í eitt af síðustu skiptunum sem við sjáum svona dag, því allt í einu verður þetta komið í allar öfgar, annað hvort verður alltof heitt eða alltof kalt. Þetta er tilvalinn dagur til að taka smá sjálfsrýni og bæta sig,“ segir Kolbeinn og Daníel bætir við: „Við verðum að vakna og halda okkur vakandi og taka ábyrgð, því þá fyrst getum við haft alvöru áhrif.“

Daníel og Kolbeinn hafa sjálfir gert breytingar á sínum lífsstíl til að bregðast við loftslagsmálum og stuðla að bættu umhverfi. „Við leggjum hönd á plóg, við höfum minnkað keyrslu, tökum meira strætó og erum líka að minnka kjötneyslu, annar okkar orðin grænmetisæta enn hinn hættur að fá sér kjöt á pítsu og fær sér vegan borgara.“

Vilja sniðganga American Bar

Eftir mótmælin segjast Kolbeinn og Daníel hafa beðið um vatn að drekka frá American Bar og þá fengið afhent fjögur plastglös, sem drengjunum fannst skjóta afar skökku við svona beint í kjölfar loftslagsmótmæla.

„Við viljum „boycotta“ American Bar, þetta eru skilaboð frá okkur, leggja hann niður! Þegar tvær manneskjur biðja um vatn eiga þær ekki að fá fjögur plastglös. Þetta var fimm mínútum eftir mótmælin og þau létu okkur líta út eins og hálfvita, hræsnara og aumingja með plastglös eftir umhverfismótmæli.“

Drengirnir tjáðu sig líka um virkjanamál, segjast ekki hafa tekið afstöðu í stóra orkupakkamálinu en þó taka skýra afstöðu gegn virkjunum og umhverfisspjöllum. „Við vitum ekkert um þriðja orkupakkann en ef þetta felur í sér að virkja meira þá vil ég hann burt,“ segir Kolbeinn og Daníel bætir við: „Ef það á að virkja Álafoss og sprengja Esjuna, þá tek ég ekki þátt í því!“

Mikið að gera hjá hljómsveitinni

Sprite Zero Klan kemur fram á ýmsum stöðum í sumar, til dæmis á hátíðinni Secret Solstice, Kótelettunni, á Garðtónleikunum vol. 2 og sjálfri Þjóðhátíð í Vestmannaeyjum

„Menn hafa talað um að við séum svona að koma í kjölfar Mozart. Við erum samt í alvörunni búnir að vera mjög duglegir að gera músík og fara ótroðnar slóðir,“ segir Kolbeinn.

Hér að neðan má sjá myndband sveitarinnar við lagið Gúd Væbs Ónlý: