Darren Bent, fyrrum leikmaður Tottenham og enska landsliðsins, var handtekinn um helgina samkvæmt enskum miðlum.

Bent var afar öflugur framherji á sínum tíma en hann er 35 ára gamall í dag og starfar aðallega í sjónvarpi hjá Sky Sports.

Samkvæmt fregnum þá brjálaðist Bent á dögunum er hann fann eiginkonu sína Kirsty með öðrum manni á þeirra heimili.

Bent sá bifreið fyrir utan hús þeirra hjóna og keyrði nokkra hringi í kringum hverfið áður en maðurinn yfirgaf svæðið að lokum.

Bent gekk þá reiður að eiginkonu sinni og rifust þau heiftarlega áður en hringt var á lögregluna.

Greint er frá því að Bent hafi fengið ábendingu áður um að ókunnugur maður hafi verið staddur á heimili þeirra er hann var á leið í vinnuna.

,,Darren brjálaðist eftir að rándýr jakkaföt hans voru rifin. Þetta var klikkun,“ er haft eftir vitni sem var á staðnum en rifrildi Bent og Kirsty fór yfir strikið.

Lögreglan mætti síðar á svæðið og handtók reiðan Bent en honum var sleppt stuttu seinna og var ekki ákærður.

Þessi fyrrum enski landsliðsmaður hefur áður lent í veseni í hjónabandinu en Kirsty ásakaði hann um framhjáhald stuttu áður en þau eignuðust saman tvíbura.