Baldvin Þorsteinsson, stjórnarformaður Eimskips og sonur Þorsteins Más Baldvinssonar forstjóra Samherja, hefur sent bréf til starfsmanna Samherja þar sem hann biðst afsökunar á framkomu sinni í morgun í Alþingishúsinu jafnframt því sem hann útskýrir atvikið. Eins og við sögðum frá veittist Baldvin að Má Guðmundssyni seðlabankastjóra eftir opinn fund stjórnskipunar- og eftirlitsnefndar þar sem farið var yfir aðgerðir Seðlabankans gegn Samherja varðandi gjaldeyriseftirlit. Framganga Seðlabankans í málinu hefur verið gagnrýnd en Samherji mátti þola húsleitir starfsmanna gjaldeyriseftirlits bankans og stórkarlalegar yfirlýsingar seðlabankastjóra í fjölmiðlum um lögbrot fyrirtækisins en ekkert hefur komið út úr þessu og Samherji verður ekki ákærður fyrir brot á gjaldeyrislögum. Þegar Már ætlaði að heilsa Þorsteini Má eftir fundinn sagði Baldvin honum að sýna sómakennd og drulla sér burtu. Stuggaði hann við seðlabankastjóranum en Kolbeinn Óttarsson Proppé greip inn í og stöðvaði samskipti mannanna.

Morgunblaðið hefur bréf Baldvins til starfsfólks Samherja undir höndum en í því segir meðal annars:

„Í morg­un komst ég óheppi­lega að orði við seðlabanka­stjóra í hita leiks­ins í húsa­kynn­um Alþing­is. Orðaval mitt var ekki sæm­andi og hefði ég gjarn­an kosið að hafa valið kurt­eis­legri orð.“

„Þegar við héld­um að loks væri runn­in upp sú stund að af­sök­un­ar­beiðni kæmi frá seðlabank­an­um var enn haldið áfram að rétt­læta aðfar­irn­ar. Við þær aðstæður fannst mér óviðeig­andi að seðlabanka­stjóri nálgaðist föður minn kump­án­lega og bað ég banka­stjór­ann um að láta það ógert. Orðalagið við það til­efni gekk of langt. Mér þykir það leitt og vona að Alþingi og þið liðsfé­lag­ar mín­ir virðið mér þetta til vorkunn­ar.“