Snjó kyngdi niður á suðvesturhorninu í nótt og í morgun. Lögreglan á höfuðborgarsvæðinu ítrekar að fólk reyni ekki að fara af stað fyrr en búið er að ryðja snjó af götum. Í tilkynningu frá Lögreglunni segir að miður hafi nokkrir vegfarendur ofmetið getu ökutækja sinna og hafi óskað eftir aðstoð vegna þess að þeir hafa fest sig. Lögreglan og björgunarsveitir geta ekki aðstoðað í slíkum tilvikum þar sem að ekki er nægur mannskapur í að sinna slíkum verkefnum. Snjómokstur tefst því í þeim götum þar sem bílar eru fastir og biður lögreglan því fólk að halda sig heima þar til að snjómokstur er kominn vel af stað.

Allar leiðir út úr Reykjavík fyrir utan Reykjanesbrautina voru lokaðar í morgun en nú á ellefta tímanum hefur Kjalarnesið verið opnað en ennþá eru allar leiðr austur úr borginni lokaðar samkvæmt upplýsingum frá Vegagerðinni.

Samkvæmt veðurstofu Íslands mældist snjódýptin í Reykjavík kl 9:00 í morgun 51 cm! Það er nýtt met fyrir febrúar en gamla metið var 48 cm og er frá árinu 1952. Mesta snjódýpt sem mælst hefur í Reykjavík er 55 cm en það var 18 janúar 1937.