Hörður Snævar Jónsson skrifar frá Peralada á Spáni:

Það var erfitt að lesa í Freyr Alexandersson, aðstoðarlandsliðsþjálfara Íslands þegar hann ræddi við fréttamenn fyrir æfingu liðsins í dag. Freyr var spurður um ástand leikmanna.

Ljóst er á svörum Freys að spurningarmerki eru á einhverjum lykilmönnum fyrir leikinn gegn Andorra á föstudag.

,,Það eru allir klárir, það eru nokkrir leikmenn búnir að vera kljást við kálfameiðsla. Þeir eru að æfa, við erum vongóðir um að allir geti tekið þátt í leiknum á föstudag,“ sagði Freyr fyrst um sinn.

,,Það er auðvitað dagamunur á þeim, eins og staðan er í dag þá myndi ég segja að allir verði klárir. Við þurfum að bíða og sjá.“

Freyr segir að þrír leikmenn sem hafa glímt við meiðsli séu að æfa öðruvísi en aðrir, hverjir það eru, kom ekki fram.

,,Það er eins og oft í landsliðsverkefnum, mismunandi álagsstig á mönnum. Það hafa ekki allir tekið eins, þetta eru kannski þrír leikmenn sem eru í öðruvísi prógrami.“

,,Það er enginn leikmaður sem þarf að hlífa við gervigrasinu, það mun taka toll fyrir leikmenn.“

Viðtalið við Frey má heyra í heild hér að neðan.