Fullnægingar eru frábærar fyrir heilsuna, þeim fylgir slökun, vellíðan og endurnæring. Við kynferðislega örvun eykst líka blóðflæði til kynfæra og grindarhols, og það hefur góð áhrif á starfsemi vefjanna og framleiðslu hormóna. Margar konur eru svo heppnar að geta fengið fullnægingu mörgum sinnum í röð, án þess að hvíla sig að ráði á milli, og fyrir sumar er fyrsta fullnægingin bara olía á eldinn.

Þegar kona fær fullnægingu verður skyndileg losun á kynferðislegri spennu sem hefur byggst upp með örvun á kynnæmum taugaendum.

Þegar spennan losnar verður ósjálfráður vöðvasamdráttur í grindarholi og víðar í líkamanum og sælutilfinning breiðist út um líkamann. 

Við fullnæginguna myndar líkaminn hormón eins og oxytósín, prólaktín og endorfín. Þessi hormón hafa í för með sér sælutilfinningu, slökun og knúsþörf.

Snípurinn er kynnæmasti líkamshluti konunnar og sá eini sem hefur engan annan tilgang en að veita sælu. 

Stærstu hlutar snípsins eru inni í grindarholinu og aðeins örlítill partur hans er aðgengilegur með beinni snertingu á yfirborðinu. Á þessu örlitla yfirborði sitja yfir 8.000 kynnæmir taugaendar.

Innri hlutar snípsins eru að miklu leyti úr stinningarvef. Þangað eykst blóðflæði við kynferðislega örvun – þannig fá konur standpínu inn á við!

Aðrir staðir kynfæranna eru vissulega kynnæmir, til dæmis G-bletturinn (sem í raun er hluti snípsins, aðgengilegur í gegnum örvun á framvegg legganganna), innri og ytri skapabarmar, leggangaop og endaþarmsop.

Rannsóknir hafa sýnt að 70–80% kvenna þurfa markvissa örvun á yfirborð snípsins til að fá fullnægingu.

Kynnæmustu taugaendar legganganna eru í fremsta þriðjungi þeirra, þ.e. næst opinu. 

Hægt er að fá fullnægingu með örvun annarra líkamsparta en þeirra augljósu. Til dæmis geta allt að 30% kvenna fengið fullnægingu við örvun á geirvörtum!