Framkoma lögreglunnar gegn fámennum hópi mótmælenda á Austurvelli í dag hefur verið nokkuð gagnrýnd. Kom til handalögmála milli lögreglu og mótmælenda og beitti lögreglan piparúða auk þess sem tveir mótmælendur voru handteknir. Í mótmælunum var krafist umbóta fyrir hælisleitendur og tóku hælisleitendur og íslenskt stuðningsfólk þeirra þátt í þeim. Logi Einarsson, formaður Samfylkingarnnar, skrifar um málið á Facebook:

Í dag varð ég vitni að óvenju harkalegum viðbrögðum lögreglu, gagnvart hóp í afar veikri stöðu, sem hugðist tjalda á Austurvelli og vekja athygli á málstað sínum. Ég minnist ekki að tiltölulega fámennum mótmælum hafi áður verið mætt með slíkum aðgerðum. Ég sá a.m.k. ekkert sem gaf tilefni til slíks. Þetta bætist við sífelldar þrengingar reglugerða dómsmálaráðherra í málefnum hælisleitenda og flóttamanna og boðað frumvarps hennar um sömu hópa, sem eru mikil afturför. Er nema von að maður spyrji á hvað leið stjórnvöld eru og hvort hún sé farin með samþykki VG?

Sverrir Agnarsson, fyrrverandi formaður Félags múslima á Íslandi, segir að sonur sinn hafi fengið óblíða meðferð hjá lögreglu og hafi hann þó ekki verið að mótmæla. Sverrir birtir mynd af nokkrum lögreglumönnum frá vettvangi í dag og skrifar:

Andstæðingur lögreglunnar á myndinni var sonur minn Ómar – EKKI að mótmæla, EKKI að tjalda og EKKI með pappa heldur myndavél. Hann fékk hnefahögg í brjóstkassann og piparúða í andlitið. Það þarf ekki að taka afstöðu til mótmælanna til að draga í efa að svona óstöðugir gæjar séu í rétta jobbinu.