Utanríkisráðuneytið greiddi á dögunum reikning upp á um 185 þúsund krónur frá Bjórböðum ehf. á Árskógssandi. RÚV greinir frá þessu en þar kemur fram að reikningurinn er tilkominn vegna heimsóknar Guðlaugs Þórs Þórðarsonar utanríkisráðherra og Timo Soini, utanríkisráðherra Finnlands, í Bjórböðin.
Sveinn H. Guðmarsson, upplýsingafulltrúi utanríkisráðuneytisins, segir í svari til RÚV að Guðlaugur og Soini hafi kynnt sér atvinnulíf og starfsemi fyrirtækja á Tröllaskaga þegar sá síðarnefndi var hérlendis nýverið
„Meðal annars heimsóttu þeir Bjórböðin á Árskógssandi ásamt föruneyti sínu. Eigendur fyrirtækisins, sem jafnframt reka Bruggsmiðjuna á Árskógssandi, hafa hlotið mikið lof fyrir atvinnuuppbyggingu og nýsköpun,“ segir Sveinn.
Stakt bjórbað kostar 7.900 krónur meðan parabjórbað kostar 14.900 svo líklegt má þykja að fleiri en þeir tveir fóru í bjórbað.
