Lögreglan á Suðurnesjum hefur til rannsóknar mál þar sem grunur leikur á að konu hafi verið byrlað nauðgunarlyf áður en brotið var á henni. Hvetur lögreglan fólk til að sýna fyllstu aðgát þar sem líklegt er að efnum sé blandað í drykki á skemmtistöðum. Lögreglan kallar einnig eftir því að starfsfólk á skemmtistöðum hafi vakandi auga með hegðun gesta og kalli til lögreglu ef aðstoðar er þörf. Einnig sé mikilvægt að aðstoða gesti ef grunur leikur  á um lyfjabyrlun. Eftirfarandi er fréttatilkynning lögreglunnar vegna málsins:

Lögreglan á Suðurnesjum hefur til rannsóknar ætlað kynferðisbrot þar sem grunur leikur á að konu hafi verið byrluð ólyfjan á skemmtistað í Reykjanesbæ þannig að hún hafi ekki getað spornað við því að brotið væri gegn henni. Þá hafa lögreglu borist af því spurnir að fleiri konur hafi lent í sömu aðstæðum á skemmtistöðum í umdæminu að undanförnu án þess að kærur hafi borist vegna þeirra tilvika. Lögreglan vill af þessu tilefni vekja athygli á þessu og hvetja fólk til að sýna fyllstu aðgát en telja má víst að efnum sé blandað út í drykki fólks á skemmtistöðum með þessum afleiðingum. Jafnframt beinir lögreglan því til starfsfólks á skemmtistöðum að fylgjast vel með gestum, kalla eftir aðstoð lögreglu og aðstoða gesti eftir atvikum ef einhver grunur er uppi um lyfjabyrlun.