Það varð allt vitlaust í íslenskum fótbolta haustið 2007 þegar Margrét Lára Viðarsdóttir var ekki kjörinn besti leikmaður ársins. Andstæðingar hennar í deildinni þoldu ekki yfirburði Margrétar og rottuðu sig saman, þær ákváðu í sameiningu og völdu hana ekki sem leikmann ársins.
Margrét hafði átt magnað sumar, skorað 38 mörk í 16 leikjum og var þar að setja markamet. Leikmenn deildarinnar virtust ekki þola hversu öflug Margrét var og úr varð algjört bíó á lokahófi KSÍ.
Frétt Fótbolta.net árið 2007:
Nú er ljóst að leiðindamál hefur komið upp í vali á leikmanni ársins í Landsbankadeild kvenna þar sem gengið var framhjá besta leikmanni Íslandsmótsins, Margréti Láru Viðarsdóttur og Hólmfríður Magnúsdóttir valin besti leikmaðurinn.
Það eru leikmenn liðanna í Landsbankadeildinni sem velja besta leikmanninn og fá sendan atkvæðaseðil frá KSÍ. Samkvæmt heimildum Fótbolta.net gengu skilaboð milli leikmanna liðanna í Landsbankadeildinni þess efnis að velja ekki Margréti Láru Viðarsdóttur besta leikmanninn í Landsbankadeild kvenna. Umræða um þetta mál fór fram í útvarpsþætti Valtýs Björns Valtýssonar, Mín Skoðun, á Xinu 977 fyrir nokkrum vikum síðan en þá trúði enginn að þetta yrði staðreyndin á lokahófinu í kvöld.
Nú er orðið ljóst að þau skilaboð hafa borið tilætlaðan árangur og Hólmfríður Magnúsdóttir hampaði verðlaunum fyrir að vera besti leikmaður deildarinnar.
Margrét Lára Viðarsdóttir bar höfuð og herðar yfir aðra leikmenn í Landsbankadeild kvenna í sumar og undir eðlilegum kringumstæðum hefði hún verið valin besti leikmaðurinn. Hún skoraði 38 mörk í 16 leikjum og setti þar með markamet í efstu deild kvenna frá upphafi, bætti met sitt frá síðasta ári.
Nú má ekki draga úr góðri frammistöðu Hólmfríðar Magnúsdóttur sem skoraði 15 mörk í 13 leikjum en þó er alveg ljóst að frammistaða Margrétar Láru var betri í sumar og er það samdóma álit flestra sem fylgjast með íslenskri knattspyrnu. Hólmfríður var ekki valin besti leikmaður KR á lokahófi félagisins í haust heldur Olga Færseth.
Lestu frétt Fótbolta.net hérna.
Margrét lét þessi leiðindi ekkiá sig fá og hélt áfram að skara fram úr í íslensku íþróttalífi, hún er að margra mati besta knattspyrnukona sem Ísland hefur átt.
