Lögreglunni á höfuðborgarsvæðinu barst í nótt tilkynning um að poki hefði verið skilin eftir á útidyratröppum. Einstaklingurinn sem hringdi grunaði að lík hefði verið skilið þar eftir.

Þetta er meðal þess sem fram kom í árlegu „tíst“ maraþoni lögreglunnar á samskiptamiðlinum Twitter í nótt. Tilkynningar voru settar inn undir myllumerkinu #löggutíst.

Fram kemur að umræddur tilkynnandi hafi verið hvattur til að skoða pokann, en við rannsókn tilkynnanda kom í ljós að hann var fullur af pappír.

Líkt og venjulega hafði lögreglan í nógu að snúast og þurfti meðal annars að eiga við kjötþjóf, laser sem beint var inn á skrifstofur í austurborginni, nágrannaerjur í Breiðholti, óvelkominn mann á stigagangi og símtal frá vistmanni á Kleppsspítala.

Lögreglan var kölluð að heimili á höfuðborgarsvæðinu þar sem karlmaður óskaði eftir því að vera sóttur. Ástæðan var sú að hann hafði lent í útistöðum við eiginkonu sína. Fram kemur að maðurinn hafi hringt í Neyðarlínu og óskað eftir að vera sóttur en kona mannsins hafi síðar hringt skömmu síðar og afboðað komu lögreglunnar. Lögreglan mætti engu að síður á staðinn til að ganga úr skugga um að allt væri í lagi.

Þá var tilkynnt  um mann sem var að ganga á milli húsa í Bústaðahverfinu að kíkja á glugga. „Líklega er Stúfur villtur og langar að komast heim til Grýlu. Lögreglan fann hann ekki þrátt fyrir mikla og langa leit,“ segir í Twitter færslunni.

Ein athyglisverðasta færslan inniheldur ljósmynd sem tekin var í miðborginni í  nótt en  þar má sjá sex lögregluþjóna sem hafa náð að yfirbuga karlmann sem ráðist hafði á dyravörð á skemmtistað í Austurstræti.

Í færslunni segir að það sé vissulega slæm hugmynd að ráðast á dyraverði en það sé enn verri hugmynd að ráðast á þá fyrir framan lögreglumenn.

Að ráðast á dyraverði er slæm hugmynd – að ráðast á dyraverði fyrir framan lögreglumenn er enn verri hugmynd.#löggutíst pic.twitter.com/3pYmKyyPbP

— LRH (@logreglan) December 15, 2018