Í gærkvöldi bárust lögreglunni á Vestfjörðum upplýsingar um að skipstjóri á fiskibát væri mögulega undir áhrifum fíkniefna við stjórn bátsins. Báturinn var þá að nálgast Flateyri að loknum veiðum. Lögreglumenn fóru á Flateyri í því skyni að athuga áreiðanleika upplýsinganna.
Þegar báturinn var að leggjast að bryggju og skipstjórinn varð var við lögreglumennina, snéri hann frá, sigldi úr höfn og áleiðis út Önundarfjörð. Slökkti hann um leið öll siglingaljós og fljótlega á sjálfvirkum tilkynningarskyldubúnaði. Því gat Vaktstöð siglinga m.a. ekki séð staðsetningu bátsins.
Í framhaldinu voru björgunarsveitir kallaðar út til leitar að bátnum, auk þyrlu og varðskips Landhelgisgæslunnar. Þess utan fóru lögreglumenn á nálægar hafnir.
Um tveimur klst eftir að báturinn hafði farið frá Flateyri kom hann í höfn á Suðureyri. Var skipstjóri bátsins þá handtekinn og færður á lögreglustöðina á Ísafirði vegna rannsóknar málsins, það er að segja grun um stjórn skips undir áhrifum fíkniefna auk gruns um brot á lögum um lögskráningu sjómanna.
Honum hefur nú verið sleppt en rannsókn málsins heldur áfram.
