„Það verður að finna þá, þeir verða stoppaðir og þeim verður refsað. Það er ekki til sá staður í heiminum þar sem þeir geta falið sig,“ sagði George W. Bush, fyrrverandi forseti Bandaríkjanna, eftir hryðjuverkaárásirnar í Bandaríkjunum þann 11. september 2001. Bush vísaði þarna til 22 einstaklinga sem bandarísk stjórnvöld töldu að bæru ábyrgð á ódæðisverkunum og öðrum voðaverkum á árunum á undan sem beindust gegn Bandaríkjunum. Efstur á blaði var Osama bin Laden sem bandarísk yfirvöld náðu loks að fella árið 2011. En hvað varð um alla hina? ABC tók á dögunum saman upplýsingar um afdrif þeirra.

Hinir látnu:

Osama bin Laden:
Bin Laden var talinn hafa borið höfuðábyrgð á hryðjuverkaárásunum 11. september en hann var einnig talinn bera ábyrgð á sprengjuárásum á bandarísk sendiráð í Austur-Afríku, Tansaníu og Keníu, árið 1998. Yfir 200 manns féllu í þeim árásum. Bin Laden var sem kunnugt er felldur af bandarískum sérsveitarmönnum í Pakistan í maí 2011.

Muhammed Atef:
Atef, sem var einn æðsti leiðtogi al-Kaída, var einnig eftirlýstur vegna árásanna á sendiráðin. Atef var drepinn í áhlaupi Bandaríkjamanna á bækistöðvar al-Kaída í Afganistan í nóvember 2001.

Fazul Abdullah Mohammed:
Fazul var æðsti koppur í búri innan al-Kaída í Austur-Afríku. Líkt og í tilfellum Atefs og bin Ladens var Fazul eftirlýstur vegna árásanna árið 1998. Hann var skotinn til bana í Sómalíu í júní 2011.

Mustafa Mohamed Fadhil:
Mustafa var talinn hafa skipulagt árásirnar á sendiráð Bandaríkjanna árið 1998. Ekki liggur fyrir hvenær Mustafa var drepinn en það gerðist einhvern tímann eftir árásirnar 2001. Fadhil var talinn hafa útvegað sprengiefnið sem notað var í árásinni í Tansaníu. Í gögnum sem Wikileaks lak árið 2011, svonefndum Guantanamo-skjölum, kom fram að hann væri látinn. Al-Kaída staðfesti það 2013.

Fahid Mohammed Ally Msalam:
Msalam var talinn hafa útvegað ökutækin sem notuð voru til að sprengja sendiráðin árið 1998. Hann var drepinn í drónaárás Bandaríkjamanna í Pakistan árið 2009.

Sheikh Amhed Salim Swedan:
Swedan var, líkt og Msalam, drepinn í Pakistan í drónaárás árið 2011. Þeir dvöldu á sama stað þegar árásin var gerð.

Ahmed Mohammed Hamed Ali:
Ahmed var drepinn af CIA í Pakistan árið 2011 líkt og Msalam og Swedan.

Imad Mughniyah:
Imad var eftirlýstur vegna ráns á flugvél Trans World Alirlines árið 1985. Vélinni var rænt þegar hún var á leið frá Kaíró til San Diego og einn bandarískur hermaður sem var um borð, Robert Stetham, var pyntaður og myrtur. Imad var drepinn þegar bílsprengja sprakk í Damaskus í Sýrlandi árið 2008.

Hinir handteknu

Khalid Shaikh Mohammed: Mohammed var einn af aðalmönnunum á bak við árásirnar 2001. Hann var handtekinn í Pakistan árið 2003. Allar götur síðan hefur hann verið í Guantanamo-fangabúðunum á Kúbu.

Ahmed Ibrahim al-Mughassil: Mughassil var eftirlýstur vegna aðildar að sprengjuárás í Khobar í Sádi-Arabíu árið 1996 þar sem 19 Bandaríkjamenn féllu. Tvenn samtök lýstu ábyrgð á ódæðunum, Hezbollah-samtökin í Sádi-Arabíu og al-Kaída. Mughassil var hershöfðingi innan raða Hezbollah í landinu. Hann var að sögn handtekinn árið 2015 þó að hann sé enn á lista FBI yfir eftirlýsta hryðjuverkamenn.

Ahmed Khalfan Ghailani: Ghailani bar ábyrgð á skipulagningu árásanna í Tansaníu og Keníu árið 1998. Hann var handtekinn í Pakistan árið 2004 og framseldur til Bandaríkjanna. Hann afplánar lífstíðarfangelsisdóm í Supermax-fangelsinu í Florence í Colorado.

Anas al-Liby: Eins og svo margir var Liby eftirlýstur vegna árásanna árið 1998. Fimmtán ár liðu þar til hann var handtekinn en það gerðist á götum Tripoli í Líbíu árið 2013. Hann var framseldur til Bandaríkjanna þar sem hans biðu réttarhöld en hann lést nokkrum dögum áður en þau áttu að hefjast, að sögn vegna krabbameins í lifur.

Þeir sem eru á flótta

Ayman al-Zawahiri: Eftir dauða Osama bin Laden árið 2011 tók al-Zawahiri við völdum innan al-Kaída þar sem hann hefur meðal annars talað gegn ISIS. Hann er tæknilega séð enn eftirlýstur vegna árásanna á sendiráð Bandaríkjanna árið 1998.

Abdullah Ahmed Abdullah: Abdullah er eftirlýstur vegna árásanna árið 1998 og er í dag talinn meðal efstu manna í valdastiga al-Kaída. Hann var í stofufangelsi í Íran í um áratug, en honum var sleppt úr haldi í fyrra. Talið er að hann haldi til í Sýrlandi.

Saif al-Adel:
Saif er fyrrverandi hershöfðingi í egypska hernum en líkt og Abdullah var hann í stofufangelsi í Íran í nokkur ár. Honum var sleppt árið 2010 eða 2013. Talið er að hann sé í Sýrlandi þar sem hann vinnur með liðsmönnum al-Kaída þar í landi. Hann er talinn hafa tekið þátt í árásunum 1998.

Hasan Izz al-Din: Hassan er talinn hafa skipulagt ránið á flugvél Trans World Airlines árið 1985. Að sögn FBI er hann talinn halda til í Líbanon.

Ali Atwa: Atwa er talinn hafa skipulagt ránið á vél Trans World Airlines eins og Hassan og Imad. Hann er talinn halda til í Líbanon eins og Hassan.

Abdul Rahman Yasin: Yasin er talinn bera ábyrgð á sprengjuárásinni í World Trade Center árið 1993. Abdul, sem fæddist í Bandaríkjunum, er talinn hafa flúið til Íraks en síðan þá hefur ekkert spurst til hans.

Ibrahim Salih Mohammed al-Yacoub: Ibrahim er eftirlýstur vegna aðildar að árásunum í Khobar í Sádi-Arabíu árið 1996 þar sem 19 Bandaríkjamenn féllu. Óvíst er hvar hann heldur sig í dag en hann er þó enn talinn hafa náin tengsl við Hezbollah-samtökin í Sádi-Arabíu.

Ali Saed Bin Ali El-HoorieEl-Hoorie er eftirlýstur vegna aðildar að sprengjuárásinni í Khobar. Hann gengur enn laus, 20 árum eftir voðaverkin þar sem 20 féllu og tæplega 500 særðust. Hann var í bifreiðinni sem sprengd var í loft upp, en flúði af vettvangi skömmu áður en hún sprakk.