Það getur verið mjög erfitt fyrir unga leikmenn að halda haus þegar stærstu lið heims sýna þeim áhuga.

Gott dæmi er hinn 22 ára gamli Donis Avdijaj sem spilar í dag með liði Willem í Hollandi.

Avdijaj er framherji en hann var gríðarlegt efni á sínum tíma og spilaði mjög ungur með aðalliði Schalke í Þýskalandi.

Hann var talinn mikið undrabarn og spilaði með yngri landsliðum Þýskalands. Ferillinn hefur þó ekki náð flugi hingað til.

Avdijaj yfirgaf Schalke fyrir Willem fyrr á þessu ári og er nú orðinn landsliðsmaður Kosóvó. Fjölmörg stórlið buðu honum milljónir á unglingsárunum.

,,Á þessum tíma þá vildu allir vera vinir mínir. Allir sögðu mér hvað væri best fyrir mig. Ég var ekki með umboðsmann og vissi ekki hvernig ég ætti að taka á þessu,“ sagði Avdijaj.

,,Á yngri árunum skoraði ég yfir 20 mörk á hverju tímabili. Ég skoraði líka 13 sinnum fyrir yngri landsliðið í 13 leikjum og hélt að það yrði eins sem atvinnumaður.“

,,Þegar ég var 15 eða 16 ára gamall þá gat ég ekki skilið þetta klapp á bakið, sérstaklega þegar mjög stór lið voru að bjóða mér margar milljónir.“

,,Það er mun erfiðara að verða ekki klikkaður en að verða klikkaður í svona stöðu. Áður en ég samdi við Schalke þá fékk ég tilboð frá Juventus, Arsenal, Manchester United og Liverpool.“

,,Það skipti engu máli í hvaða móti ég var að spila, það voru alltaf njósnarar að fylgjast með mér.“