„Á mánudaginn þegar frekari upptökur komu fram, það grófasta, þá bognaði ég. Ég trúði þessu ekki að menn gætu talað með þessum hætti. Ég vek athygli á því að þetta er algjört ofbeldi. Ég svaf ekkert aðfaranótt þriðjudags. Síðan fór ég á ríkisstjórnarfund.“

Þetta segir Lilja Alfreðsdóttir menntamálaráðherra í samtali við Einar Þorsteinsson. Lilja verður í viðtali í Kastljósi núna á eftir. Ljóst er á viðtalinu að Lilja er bæði reið og sár. Í Kastljósi ræðir hún um hvernig það var að verða vitni að því að heyra á hvaða hátt rætt var um hana á Klaustri þar sem Sigmundur Davíð Gunnlaugsson, Gunnar Bragi Sveinsson og Bergþór Ólason þingmenn Miðflokksins ræddu um hana með grófum hætti og fjallað hefur verið um á DV og Stundinni. Í viðtalinu mun koma fram að hún telji að þingmenn Miðflokksins muni einangrast.

Hún segir að gott hafi verið á milli hennar og Sigmundar og því hafi það sem hafi átt sér stað á barnum komið henni í opna skjöldu. Í viðtalinu spurði Einar hvort hægt væri að fyrirgefa þetta. Svar Lilju var eftirfarandi:

„Nei, ég er svo ofboðslega ósátt við þetta.“