Það var ekki boðið upp á neina flugeldasýningu í kvöld er Írland fékk lið Wales í heimsókn í Þjóðadeildinni.

Wales hafði að lokum betur í nokkuð jöfnum leik en Harry Wilson gerði eina mark leiksins fyrir gestina.

Blaðamaður the BBC, Dafydd Pritchard, var á leiknum í kvöld og sá um að lýsa í beinni á vefsíðu BBC.

Pritchard skemmti sér lítið yfir leiknum og segir að stuðningsmenn Írlands hafi leiðst verulega í stúkunni.

,,Írsku stuðningsmönnunum leiðist svo mikið að þeir eru byrjaðir að gera íslenska víkingaklappið sem er svar 2016 við mexíkósku bylgunni,“ skrifaði Pritchard.

,,Það er eiginlega ekki hægt að kenna þeim um. Þetta hefur verið mjög rólegt.“

Íslendingar gerðu víkingaklappið frægt á sínum tíma er strákarnir okkar stóðu sig frábærlega á EM í Frakklandi.