Gerður Huld Arinbjarnardóttir eigandi kynlífstækjaverslunarinnar Blush selur núna fjórða árið í röð dagatöl fyrir jólin. Tvö dagatöl eru í boði og eru þau eingöngu seld í forsölu.

„Þetta eru í kringum 2000 dagatöl,“ segir Gerður, „sirka 500 eru þegar seld en forsalan byrjaði fyrir tveimur dögum.

Magnið er talsvert og þyngdin líka, eða um 7 tonn. „Ég held að þetta sé stærsti einstaki innflutningur á kynlífstækjum til landsins,“ segir Gerður.

Í fyrra flutti hún inn og seldi 1300 dagatöl, sem voru um 4 tonn. „Dagatölin seldust öll upp löngu fyrir jól, í lok október og margir sem náðu ekki að festa sér kaup á dagatali. Við hefðum getað selt miklu meira í fyrra en við gerðum.“

Bæði dagatölin koma í takmörkuðu magni og eru eingöngu seld í forsölu. „50 shades er veglegra og meira af vörum í því. Hitt er meira nuddolíur, smokkar, sleipiefni, líka titrarar og svona, en 50 shades er mun veglegra enda dýrara.“

Dagatölin eru hugsuð fyrir pör: „Þannig að það eru aðallega pör sem eru að kaupa dagatölin til að krydda upp á hversdagsleikann í desember og minna sig á að viðhalda góðu og fjölbreyttu kynlífi í amstri dagsins í desember.“

„Heildsalinn minn úti trúir varla að þetta litla land sé að panta þetta magn. Í fyrra seldum við eina tegund og 1300 eintök og það var 10% af framleiðslunni hans fyrir allan heiminn.“

Eins og áður eru dagatölin í ár 2000 og vonast Gerður til að þau seljist öll. „Nú er bara að vona að þeir sem misstu af dagatölum í fyrra verði fyrr á ferðinni í ár.“