„Þegar ég var 10 ára var mér sagt að googla glimmer.“ Þetta ritar ung íslensk kona í Twitter færslu undir myllumerkinu #ofungt. Myllumerkinu var hrundið af stað í tengslum við nýja upplýsingasíðu Börn og klámvæðing, en þar geta foreldrar og forráðamenn fræðst um skaðleg áhrif kláms og hvernig vernda megi börn fyrir því.

Í lýsingu á facebooksíðu Börn og klámvæðing segir:

„Við viljum lýsa yfir áhyggjum okkar á þessum málaflokki þar sem við höfum öll þekkingu af þessum raunveruleika. Börn alveg niður í fyrsta bekk eru komin með sinn eigin snjallsíma og hafa því fullan aðgang að netinu og þrátt fyrir netvörn eru ýmsar upplýsingar aðgengilegar sem eru óæskilegar fyrir börn. 

Margar rannsóknir hafa sýnt fram á það að þetta hefur slæm áhrif og ekki eru allir foreldrar sem gera sér fulla grein fyrir því mikla aðgengi sem barnið hefur. Við vitum að við erum ekki að fara að koma í veg fyrir það að barnið fari inná þessar síður, þó það sé slys eða ekki, en við viljum efla vitund foreldra og forráðamanna svo allir séu viðbúnir í það að takast á við því sem á eftir kemur. Við viljum að það verði vitundarvakning í kjölfar þess hve hátt klámáhorf hér á landi er meðal barna.“

Í tengslum við síðuna hefur verið hrundið af stað herferð á samfélagsmiðlum undir myllumerkinu #ofungt. Einstaklingar eru hvattir til að deila sögum af sinni fyrstu upplifun af klámi sem börn. Hér fyrir neðan má finna dæmi um nokkrar frásagnir sem deilt hefur verið undir myllumerkinu.

*Frændi minn ætlaði að sýna mér grínmynd sem gerðist á sundlaugabakkanum, ég fattaði ekki alveg húmorinn.

*Þegar ég var 14 ára gaf ég eftir suði frá kærastanum mínum af því að ég vildi ekki vera ömurleg kærasta, eina fræðslan sem ég hafði fengið var frá klámi og ég hélt að þetta væri eðlilegt. Hann nauðgaði mér oft án þess að ég gerði mér grein fyrir því.

*Ég og vinkona mín vorum 8 ára forvitnar, höfðum heyrt um playboy.com og fórum frekar þangað en að spurja kennara/foreldra um fræðslu.