Kötturinn Lísa sem pyntuð var á hrottalegan hátt í Hafnarfirði er nú á batavegi. Samkvæmt upplýsingum frá Dýraspítalanum í Garðabæ er Lísa nú farin heim til áframhaldandi hjúkrunar.
„Bati hennar hefur verið góður en hún var mjög illa haldin tvo sólarhringana og gat til dæmis ekki étið neitt sjálf. En svo tók hún vel við sér, sýkingin er á undanhaldi í sárinu og hún malar og sækir í gælur. Hún kemur í eftirlit í lok vikunnar og við búumst við því að hún nái sér að fullu,“ segir í skriflegu svari Dýraspítalans til DV.
DV greindi frá því þann 29.ágúst síðastliðinn að köttur hefði fundist í hræðilegu ásigkomulagi í Hellisgerði. Ronja Auðunsdóttir og sonur hennar voru í hjólreiðatúr í Hellisgerði þegar sonur Ronju fann köttinn nær dauða en lífi. Ronja kom þá að kettinum þar sem búið var að hengja hann og augljóslega pynta hann. „Það var búið að festa hann með netaböndum og binda hann við tréð, það var búið að hengja hann. Ég er í áfalli, þetta var bara að gerast. Það er greinilegt að hér var algjört illmenni að verki. Það var greinilega verið pynta hana. Hún er greinilega búin að liggja þarna í langan tíma, það var komin lykt og drep í sárin. Ég var heillengi að því að reyna ná böndunum af kettinum. Að hugsa sér að einhver gæti gert svona hluti.“
Ronja hafði samband við lögregluna í kjölfarið en fékk þau svör að enginn laus bíll væri á svæðinu. Hún óskaði þá eftir aðstoð inni á facebookhópnum Kattavaktin og viðbrögðin létu ekki á sér standa. Fljótlega mætti Ingibjörg Hjaltadótti hjúkrunarfræðingur, á staðinn til að sækja Lilju og koma henni undir læknishendur á Dýraspítalanum í Garðabær.
Eins og sést á myndunum hér fyrir að neðan þá stórsást á Lísu eftir árásina.
Í tilkynningu frá Dýrahjálp Íslands kom fram að Lísa hefði áður verið í fóstri hjá samtökunum áður en hún fékk varanlegt fósturheimili fyrir sex árum. „Fóstran hennar féll alveg fyrir þessari duglegu ungu læðu og endaði á að halda henni. Lísa hefur alltaf verið mjög sjálfstæð, hún elskar að vera úti og hefur haldið sig einmitt mikið til í Hellisgerði þar sem hún fannst illa limlest.“ Í tilkynningunni kom einnig fram að Lísa hefði greinilega liðið kvalir í marga daga og ekki getað nærst þar að auki.
Fram kom í fréttum Stöðvar 2 þann 1. september síðastliðinn að málið hefði verið tilkynnt til Matvælastofnunar en árásarmaðurinn, eða mennirnir eru enn ófundnir. Þann 4.september síðastliðinn var síðan greint frá því að Matvælastofnun hefði tekið ákvörðun um að kæra málið til lögreglu.
Jafnframt kom fram að hópur fólks á Facebook hefði boðist til að taka þátt í lækniskostnaði vegna umönnunar Lilju við Dýraspítalann í Garðabæ, en kostnaðurinn hljóðaði upp á rúmlega 180 þúsund krónur.
Í gærdag var síðan tilkynnt um það á facebooksíðu Dýrahjálpar að tekist hefði að safna upphæðinni á innan við fimm klukkutímum, en Lísa á enn eftir að að fara í nokkrar dýralæknaheimsóknir til viðbótar með tilheyrandi kostnaði. Dýrahjálp mun halda utan um söfnunina og koma öllum greiðslum áfram á réttan stað.
„Frábært hvað er til mikið af dýravinum sem láta sér annt um þessa fjórfættu fjölskyldumeðlimi og eru til í að aðstoða þegar þörf er á. Lísa vinnur hörðum höndum að því að ná fyrri heilsu og við fáum vonandi að fylgjast með hennar framtíðar ævintýrum.“
