Ef þú færð tilkynningu um að þú þurfir að skrá þig inn til að halda netpóstinum þínum eða öðrum reikningum skaltu ekki gera það. Slíkar tilkynningar koma frá svindlurum sem reyna að fá fólk til að smella á tengla sem leiða það inn á svikasíður. Tilgangurinn er að komast yfir innskráningarupplýsingar fólks og valda usla á netreikningum þessu. Lögreglan segist hafa fengið margar ábendingar um svindl af þessu tagi undanfarið.

Lögreglan á höfuðborgarsvæðinu varar við þessu svindli í eftirfarandi tilkynningu:

 Á undanförnu höfum við verið að fá ábendingar um að fólk er að fá tilkynningar um að það þurfi að skrá sig inn til að halda netpósti sínum eða öðrum reikningum. Það fær tölvupóst sem lítur út fyrir að vera frá viðkomandi þjónustu og er sent á tengla á netið sem tengjast þessum þjónustum ekkert heldur er um svik að ræða. Tilgangur svindlaranna er að fá fólk til að skrá sig á þessar svikasíður og komast þannig yfir aðgang að þessum reikningum. Svindlararnir get þá notað þennan aðgang sem að þeir stela til að komast inn á reikning viðkomandi og geta gert alls kyns skaða.

Almenna reglan er sú að hinir raunverulegu þjónustuaðilar senda ekki svona pósta og alls ekki tengla. Við hvetjum því fólk til að sýna varkárni og varúð ef það fær slíka tölvupósta. Með hæfilegri tortryggni þá má sjá fljótlega að þetta sé svindl. Oft eru tenglarnir mjög grunsamlegir og líkjast lítið þjónustuaðilanum eða það er búið að setja viðbótarorð í slóðina.

Þá er oft settir mjög þröngar tímatakmarkanir í þessa pósta sem eiga að skapa álag á viðtakanda sem gerir brotaþola líklegri til að gera mistök. Oftast er best að anda rólega og gagna útfrá því að þetta sé svindl. Ef um vinnupóst er að ræða hafið samband við þann sem sér um tölvumál og áframsendið póstinn á hann. Þá er rétt að benda fyrirtækjum á að auðvelt er að setja tvíþætta auðkenningu á aðganginn, þannig að til að skrá sig þarf að setja inn PIN í síma sem næsta skref annars gerist ekkert.

Við hvetjum fólk til að temja sér hæfilega tortryggni á allt sem það sér og fær í gegn um netið. Sérstaklega þegar kemur að peningum og aðgangsorðum. En munið að horfa líka á hið jákvæða, netið býður upp á óendanlega möguleika. Þetta er svolítið eins og að læra umferðareglurnar. Ef þið hafið ábendingar um netsvindl eða netglæpi endilega sendið á okkur á cybercrime@lrh.is eða abendingar@lrh.is