Lögreglan á höfuðborgarsvæðinu þurfti að sinna yfir eitt hundrað málum í gærkvöld og nótt og mikill hluti þeirra var í tengslum við mannsöfnuð niðri í miðbæ á Menningarnótt, eða yfir 90. Meðal slíkra mála voru líkamsárás, slagsmál og stympingar meðal ungmenna og nokkur mál vegna fólks sem var ósjálfbjarga vegna ölvunnar. Tíu gistu fangageymslur vegna ýmissa mála en þá má hafa í huga að þeir sem komu í miðbæinn skiptu tugum þúsunda.
Ekið á gangandi vegfaranda
Upp komu 12 mál á Lögreglustöð 2, sem er staðsett í Hafnarfirði, frá því klukkan 19:00 í gær, þar á meðal líkamsárás, grunur um akstur undir áhrifum og akstur án ökuréttinda. Ekið var á gangandi vegfaranda og slaðist hann töluvert; málið er í rannsókn.
Upp komu 11 mál á Lögreglustöð 3, sem staðsett er í Kópavogi, frá því klukkan 19:00 í gær, þar á meðal var heimilisofbeldi, innbrotstilraun og grunur um akstur undir áhrifum.
Upp komu 15 mál á Lögreglustöð 4, sem staðsett er í Grafarholti, frá því klukkan 19:00 í gær, þar á meðal var heimilisofbeldi og grunur um akstur undir áhrifum.