Breska kaffihúsakeðjan Costa Coffee horfir nú til Íslands. Þetta kemur fram á vef Markaðarins í dag. Keðjan er sú næst stærsta í heimi á eftir bandaríska kaffirisanum Starbucks.

Fram kemur að fulltrúar Costa leiti um þessar mundir að hentugu húsnæði í miðborginni en ekki er vitað hver er sérleyfishafi keðjunnar á Íslandi.

Costa var stofnað snemma á áttunda áratugunum og er í dag stærsta kaffihúsakeðja Bretlands en fyrirtækið var selt til alþjóðarisans Whitbread PLC árið 1995.

Í dag eru hátt í fjögur þúsund kaffihús rekin á vegum keðjunnar í 32 löndum en flest þeirra er að finna í Bretlandi.

Costa kemur til með að verða fimmta keðjan hér á landi sem einblínir á sölu kaffidrykkja og eru þá taldar með Kaffitár, Te og Kaffi, Dunkin Donuts og Krispy Kreme.