Kristján Andrésson hefur verið ráðinn landsliðsþjálfari Svía í handbolta karla. Frá þessu greinir Aftonbladet í Svíþjóð sem segir að Kristján skrifi undir tveggja ára samning. Tilkynnt verður um ráðninguna í dag.

Kristján er fæddur í Eskilstuna í Svíþjóð en hann lék um tíma með íslenska landsliðinu. Hann er fæddur árið 1981 og var í leikmannahópi Íslands á á Ólympíuleikunum í Aþenu árið 2004. Hann hefur stýrt IF Guif í Svíþjóð frá árinu 2007 en hann lét af störfum í vor.

Uppgangur íslenskra handboltaþjálfara hefur verið ævintýralegur á undanförnum árum og verður Kristján fimmti Íslendingurinn í starfi sem landsliðsþjálfari. Dagur Sigurðsson stýrir sem kunnugt er Evrópumeisturum Þjóðverja, Guðmundur Guðmundsson er þjálfari Ólympíumeistara Danmerkur og Patrekur Jóhannesson er þjálfari karlaliðs Austurríkis. Þá stýrir Þórir Hergeirsson norska kvennalandsliðinu þar sem hann hefur unnið til ótal verðlauna.

Sænska karlalandsliðið í handbolta er eitt það sigursælasta í sögunni. Liðið hefur orðið heimsmeistari fjórum sinnum, Evrópumeistari fjórum sinnum auk þess að vinna fjórum sinnum til silfurverðlauna á Ólympíuleikum, síðast í London árið 2012.