Lögreglan á Suðurlandi lokaði gististað í Árnessýslu síðastliðinn fimmtudag þegar í ljós kom að leyfi til rekstrar var útrunnið. Þetta kemur fram í dagbók lögreglu,

Að sögn lögreglu var rekstrarðila gefið færi á að útvega gestum sínum gistingu annars staðar svo þeir yrðu ekki á götunni. Þá hefur lögreglumaður verið ráðinn í hálft starf til að hafa eftirlit með veitinga- og gististöðum í umdeæminu. Reiknar lögreglan með að fleiri tilvik sem þessi komi upp á næstunni.

„Þegar tilvik sem þessi koma upp er lögreglu skylt að stöðva rekstur strax og henni ekki heimillt að veita einhverja fresti til að afla tilskilinna leyfa. Því er fullt tilefni til að hvetja þá sem ekki eru með sín mál í lagi til að kippa þeim í liðinn strax því ljóst er að trúverðugleiki gististaðar tapast ef rekstraraðili þarf að vísa gestum sínum út,“ segir lögreglan.