Steve Crawford, 72 ára fyrrverandi öryggisvörður, svipti sig lífi þegar lögreglan heimsótti hann á dögunum til að framkvæma húsleit. 44 árum eftir að 19 ára stúlka, Arlis Perry, fannst látin í kapellu á heimavist Stanford-háskólans í Bandaríkjunum taldi lögregla sig loks vera komna á sporið.

DNA-rannsókn leiddi í ljós að títtnefndur Crawford hafði að líkindum myrt stúlkuna. Það var jú hann sem hafði samband við lögreglu á sínum tíma þegar hann sagðist hafa fundið lík hennar.

Crawford lá undir grun á sínum tíma en lögreglan taldi sig þó ekki getað sannað að hann hefði framið morðið. Þegar Perry fannst var hún nakin fyrir neðan mitti. Henni hafði verið nauðgað og með aðstoð DNA-tækninnar sem var ekki komin til sögunnar þegar morðið var framið tókst lögreglu að finna meintan geranda, Steve Crawford.

Það var svo í gær að lögreglumenn komu að heimili Crawfords til að framkvæma húsleit. Þegar Crawford varð ljóst í hvað stefndi náði hann í skotvopn sem hann beindi að sjálfum sér. Þegar lögreglumenn komust inn í húsið var Crawford látinn.