Aron Einar Gunnarsson, landsliðsfyrirliði, var óánægður með spilamennsku íslenska liðsins í seinni hálfleik gegn Nígeríu í dag.

Ísland tapaði 2-0 fyrir Nígeríu í öðrum leik riðlakeppni HM en eftir markalausan fyrri hálfleik fór eitthvað úrskeiðis.

,,Nú förum við bara í það að rýna þennan leik. Það var slæmt fyrir okkur að fá á okkur mark eftir fast leikatriði hjá okkur. Við vorum með þá og okkur leið vel á vellinum,“ sagði Aron.

,,Þetta eru leiðinleg úrslit og spilamennskan í seinni var ekki frábær en við höldum áfram og bætum það sem þarf að bæta og tökum svo Króatíu í næsta leik og vonum að úrslitin úr hinum leiknum verði hagstæð.“

,,Við ætluðum að keyra meira upp vængina þar sem okkar bestu færi komu úr þegar við skiptum á köntunum og fengum bakverðina okkar í leik.“

,,Við gerðum ekki nóg af því, því miður en samt sem áður gerðu þeir vel í seinni og fá mark eftir okkar fast leikatriði sem er ekki líkt okkur. Það var ódýrt að fá á sig þannig mark.“

,,Það er ekki hægt að segja að við höfum ekki lagt allt í sölurnar. Maður sá það bara í klefa eftir leik, maður tók í spaðann á mönnum og þeir voru gjörsamlega búnir.“

,,Við viljum hafa þetta í okkar höndum en eins og ég segi, við þurfum að fara erfiðu leiðina og vonum að þetta gangi upp.“