Ef miðað er við niðurstöður Evrópsku lífskjararannsóknarinnar þá eru Íslendingar ein allra áhugasamasta þjóð heimsálfunnar um íþróttaviðburði. Þetta kemur fram í frétt Hagstofunnar. Rannsóknin var gerð árið 2015 og voru þátttakendur, sem voru 16 ára og eldri, spurðir hversu oft þeir hefðu verið sótt íþróttaviðburði á undangegnum tólf mánuðum. Rúmur helmingur landsmanna hafði sótt að minnsta kosti einn íþróttavuðburð á þessu tímabili og gerðu aðeins Hollendingar betur í þeim efnum.

Þess má geta að ekki er ólíklegt að hlutfallið væri enn hærra ef rannsóknin væri framkvæmd í ár enda hafa íslenskt landslið í hinum ýmsu íþróttum átt sögulega góðu gengi að fagna.

Athygli vekur að það virðast hafa verið íslenskar konur sem skila Íslandi öðru sætinu. Í áðurnefndri frétt Hagstofunnar kemur fram að alls staðar í Evrópu voru karlar líklegri en konur til að sækja íþróttaviðburði, en kynjabilið var nokkuð breytilegt á milli landa. Kynjabilið var minnst á Íslandi hjá þeim sem sóttu a.m.k. einn íþróttaviðburð, eða 8,3 prósentustig. Næst á eftir komu Holland og Malta með 9,1 og 10 prósentustiga mun á kynjunum. Ef grannt er skoðað má sjá að það er einkum aðsókn íslenskra kvenna á íþróttaviðburði sem skilar Íslandi öðru sætinu, en íslenskar konur voru í öðru sæti í Evrópu en íslenskir karlar í því áttunda.