Eiður Smári Guðjohnsen, einn besti leikmaður Íslandssögunnar og markahæsti leikmaður landsliðsins frá upphafi, er bjartsýnn fyrir leikinn gegn Argentínu í Moskvu á laugardag.
„Við erum á mjög góðum stað í augnablikinu,“ segir Eiður Smári í viðtali við BBC Sport. Í greininni er bent á velgengni Íslands í Evrópukeppninni í Frakklandi 2016 þar sem liðið fór ósigrað upp úr riðlinum, sló England úr leik í 16-liða úrslitum áður en kom að tapinu gegn Frökkum í 8-liða úrslitum.
Liðið fylgdi þessu svo eftir með því að vinna sinn riðil í undankeppni HM; ógnarsterkan riðil þar sem Króatar, Úkraínumenn og Tyrkir horfðu á eftir Íslendingum fara beint í lokakeppnina.
„Ég held að fólk geti hætt að tala um heppni,“ segir Eiður Smári í viðtalinu og vísar í árangur íslenska liðsins á undanförnum árum. „Við hlökkum til að vonandi sýna heimsbyggðinni að við eigum fyllilega skilið að vera hérna,“ segir hann og vísar í heimsmeistaramótið.
