Steinunn Sigurðardóttir skráir sögu Heiðu Guðnýjar Ásgeirsdóttur, fjalldalabónda, eins og hún kallar hana. Heiða er ung kona, einyrki, sem býr á Ljótarstöðum í Skaftártungu þar sem hún er uppalin – hún tók við búinu eftir föður sinn.
Um tíma kom til álita að Heiða yrði fyrirsæta. Hún fór til New York og reyndi fyrir sér á því sviði og varð nokkuð vel ágengt. En hún vildi frekar búskapinn, umgengni við dýr og líkamlega vinnu.
Bókin um Heiðu snýst í aðra röndina um baráttu hennar gegn virkjunaráformum í sveitinni. Hún lýsir því að mikilli innlifun hversu nátengd hún er landinu – með svokallaðri Búlandsvirkjun hefði orðið til stórt miðlunarlón við túnfótinn hennar.
Sjálf fór Heiða í framboð í sveitarstjórn til að andæfa virkjunaráformunum, en síðar var henni boðið í framboð til Alþingis og er nú varaþingmaður fyrir VG á Suðurlandi.
Um þessa bók fjöllum við í Kiljunni í kvöld.
