Ég er hérumbil alveg hættur að sjá Viðskiptablaðið sem er miður – ég hef haft pata af því að það hafi batnað mikið eftir að blaðið fékk alvöru ritstjóra, ekki bara mann með pólitískt agenda, og nokkra ágæta blaðamenn sem yfirgáfu Morgunblaðið.

Ef marka má þennan pistil Jóhanns Haukssonar er forsíðuefnið í Viðskiptablaðinu þessa vikuna mjög merkilegt.

Blaðamaður þaðan, Magnús Halldórsson,  hefur fylgst með réttarhöldum í máli Baldurs Guðlaugssonar, Jóhann segir svo frá:

„Með frétt sinni í Viðskiptablaðinu sl. fimmtudag lyfti Magnús lokinu af ormagryfju. Í réttarsalnum fékk hann greinargerð um vitnisburð margra úr innsta hring mánuðum, jafnvel misserum áður en bankarnir hrundu.

Hvað kom fram í réttarsalnum?

Í fyrsta lagi að til eru fundargerðir sem bera þess vitni að saman sátu á Baldur, Jónas Fr. Jónsson forstjóri Fjármálaeftirlitsins og fleiri á fundum í samráðshópi um fjármálastöðugleika mánuðum fyrir bankahrun með innmúraðar upplýsingar um dauðvona Landsbanka og grafalvarlega fjárþröng allra bankana.

Í öðru lagi að Baldur, sem seldi hluti sína í Landsbankanum 18. og 19. september 2008 fyrir 192 milljónir króna – kortéri fyrir hrun – , hafði þegar í lok júlí látið bóka á umræddum samráðsfundum að það yrði banabiti bankanna ef þær upplýsingar, sem hópurinn bjó yfir, yrði á almanna vitorði.

Tryggvi Pálsson, þrautreyndur bankamaður og yfirmaður í Seðlabankanum, sagði í þriðja lagi, að alla tíð og alltaf hafi samráðshópurinn fjallað um innherjauppýsingar sem haft gátu úrslitaáhrif á verðmæti hlutabréfa í bönkunum. Það merkir að hópurinn var með upplýsingar í höndum sem lögum samkvæmt var skylt að birta öllum almennum hluthöfum í kauphöll þannig að allir hefðu þeir jafna aðstöðu til að bregðast við upplýsingunum og bjarga eigin skinni eins og vera ber.“