Eftirfarandi bréf sendir Ólöf Nordal alþingismaður:

— — —

„Sæll Egill,

mig langar að segja vegna ummæla minna í þættinum hjá Ingva Hrafni að þetta orðalag mitt, að skýrslan þvælist fyrir, var ekki vandað.  Og ekki heldur í samræmi við þann málflutning sem ég hef haft uppi um skýrsluna.

Ég tel útgáfu þessarar skýrslu marka tímamót.   Ég  vona að okkur takist að draga af henni lærdóm, og ég vona að okkur takist að tala málefnanlega um niðurstöður hennar, enda þar afar margt merkilegt sett fram.  Það tekur hins vegar tíma að gera það.  Bæði þarf þingið að taka á efni hennar en ekki síst stjórnmálaflokkarnir.

Þar sem skýrslan kom út svo skömmu fyrir kosningar var augljóst mál að hún yrði að hluta til efniviður í kosningabaráttunni.  Það undrar  mig ekki.  Hins vegar verður það til þess, að þau málefni sem þar eru efst á baugi kunna að færast niður listann.  Það var í því ljósi sem þessu orð féllu.

Mér finnst mikilvægast að efni hennar og niðurstöður verði tekið til gaumgæfilegrar athugunar á opinberum vettvangi og á vandaðan og yfirvegaðan hátt.

bestu kveðjur
Ólöf“