Ég sat á fundi þar sem blaðamenn frá Norðurlöndunum gerðu grein fyrir þeim málum sem ber hæst í hverju landi.

Ég er eiginlega á þeirri skoðun eftir fundinn að Norðurlönd séu eins konar resarvat – griðland. Staður þar sem eru í raun sáralítil vandamál – allavega ef borið er saman við aðra staði í heiminum.

Í Danmörku eru að koma kosningar. Það er enn verið að tala um innflytjendamál – ég fæ varla séð að það sé vandamál sem þarf að hafa miklar áhyggjur af. Hins vegar hafa sumir Danir miklað þetta óskaplega fyrir sér. Einnig er spurt hvort rétt sé að efna til þjóðaratkvæðagreiðslu um evruaðild meðfram kosningunum, en það verður varla raunin.

Í Noregi er ríkisstjórn Verkamannaflokksins, Sósíalíska vinstriflokksins og Miðflokksins heldur óvinsæl. Nú er það ekki Framfaraflokkurinn sem stækkar á kostnað stjórnarflokkanna, heldur gamli hægriflokkurinn sem nefnist einfaldlega Hægri. Eitt stærsta málið innan stjórnarinnar er olíuvinnsla við Lófóten. Verkamannaflokkurinn er hallur undir hana og er undir þrýstingi frá sveitarstjórnarmönnum úr eigin röðum, frá verkalýðshreyfingunni og atvinnurekendum, en sósíalistarnir eru á móti. Minnir meira en lítið á álversumræðurnar á Íslandi.

Og í Noregi er reyndar líka deilt um risastóra álverksmiðju sem Alcoa vill reisa í Finnmörku og knýja með gasi úr Barentshafi. Í því máli eru hinar pólitísku línur svipaðar og í deilunum um olíuna – og í deilum um álver á Íslandi.

Í Finnlandi eru líka að koma kosningar. Þar snýst allt þessa dagana um flokk hinna Sönnu Finna undir stjórn Timo Soini, en flokkurinn er farinn að nálgast tuttugu prósent í skoðanakönnunum. Það þýðir að erfitt verður að halda honum utan ríkisstjórnar. Sönnu Finnarnir eru ekki rasistar eins og Svíþjóðardemókratarnir, en hins vegar eru þeir á móti elítum og því sem er kallað stjórnmálastéttin. Kosningarnar í Finnlandi verða ekki rafrænar í þetta sinn, en síðustu sveitarstjórnakosningar í landinu voru rafrænar og mistókust herfilega þótt þær hafi ekki verið dæmdar ógildar.

Svo er það Svíþjóð. Þar í landi er ógurlegur hagvöxtur um þessar mundir og líklega er Svíþjóð það land í Evrópu sem er að koma best undan kreppunni. Ég skrapp yfir til Svíþjóðar í dag. Las blað sem er dreift ókeypis á Eyrarsundssvæðinu. Aðalfréttin var um stúlku sem hafði hjálpað til að koma upp um reiðhjólaþjófa en næststærsta fréttin var um hvaða brögð af ís yrðu vinsælust í sumar.

Það er samt kalt og ekkert sem minnir á vorið hér við sundið.