Suze Rotolo er stúlkan sem var með Dylan framan á hinni stórkostlegu plötu The Freewheelin´ Bob Dylan. Hún andaðist á föstudag eftir ströng veikindi.

Myndin markaði einhvern veginn tímamót eins og platan, þetta unga fólk sem gekk saman í slabbinu í New York. Hún var aðeins 17 þegar þau hittust, hann 20 ára.

Það er sagt að lagið Don´t Think Twice It´s Allright hafi verið samið um hana.

Rotolo var kærasta Dylans frá 1961 til 1964. Hún var frá Queens, af ítölskum ættum, foreldrar hennar voru kommúnistar sem þurftu að fara leynt með skoðanir sínar á McCarthy tímanum. Það er sagt að hún hafi haft áhrif á stjórnmálaskoðanir söngvarans á tímanum þegar hann var hvað pólitískastur.

Síðan skildu leiðir, en Suze Rotolo var áfram sögufræg í Greenwich Village. Hún skrifaði endurminningabók þaðan sem kom út árið 2008 og fékk mjög góðar viðtökur. Hún var náttúrlega kona sem átti sitt eigið líf, kenndi í Parsons lista- og hönnunarskólanum, en er partur af hinni miklu Dylan mýtólógíu.