Maður les á netsíðum Sjálfstæðismanna sem eru argir vegna afstöðu forystunnar til Icesave III að nú sé kominn tími til að halla sér að Framsókn.

Þar sé fólk sem standi í lappirnar, svosem Vigdís Hauksdóttir og Gunnar Bragi Sveinsson. Þá er óskað eftir því að formaðurinn, Sigmundur Davíð Gunnlaugsson, taki eindregnari afstöðu á móti ESB.

Bak við þetta fólk stendur gamli formaðurinn, Guðni Ágústsson nokkuð þétt. Hann er í góðu talsambandi við Hádegismóa og hefur meiri áhrif í Framsókn en flesta grunar.

Þessum pælingum fylgir að ESB-armurinn í flokknum sé veikur. Guðmundur Steingrímsson hafi lítið bakland þrátt fyrir ætterni sitt og að Siv Friðleifsdóttir sé að leita að starfi fyrir utan stjórnmálin.

Það væri að sönnu áhugaverð niðurstaða þessara hræringa ef Framsóknarflokkurinn myndi eflast á kostnað Sjálfstæðisflokksins og yrði jafnvel þungamiðjan í baráttunni gegn Evrópusambandinu.