Ég sat eitt sinn á næsta borði við hinn látna rússneska auðmann Boris Berezovskí á veitingahúsi í London. Hann fannst látinn á heimili sínu í Surrey í dag.

Nærvera hans var ekkert sérlega þægileg. Hann fiktaði án afláts við síma, hringdi, hætti við, talaði stutt við einhvern, með honum á borðinu var kona sem virkaði eins og einkaritari. Hann sjálfur var á iði, virtist vera taugaveiklaður. Hann var ekkert að flýta sér að borða, þetta var í hádeginu, en það var því líkast að borð á veitingahúsum væru eins og skrifstofa fyrir hann.

Berezovskí var stærðfræðingur að mennt, þótti fluggáfaður, og náði að auðgast í upplausninni í Rússlandi á tíma Jeltsíns forseta. Þá var hann í innsta hring hjá fjölskyldu forsetans. Hann var einn hinna svokölluðu ólígarka sem sagðir eru hafa rænt Rússland innan í frá. En honum sinnaðist við Pútín eftir að KGB-naglinn varð forseti. Bereszovskí flúði land og settist að í London; annar ólígarki, Mikhail Khodorkovskí hefur verið í fangelsi síðan 2003.

Berezovskí var dæmdur fyrir fjársvik og spillingu í Rússlandi, en fékkst ekki framseldur. Berezovskí hélt því fram að öfl heima í Rússlandi vildu myrða sig og hefðu margsinnis reynt það, Alexander Litvinenko, samstarfsmaður hans, var drepinn með geislavirku efni í London 2006.

Nú er sagt að Berezovskí hafi hugsanlega fyrirfarið sér. Hann hafi verið orðinn blankur, þurft að borga háa lögfræðireikninga vegna eilífra málaferla sem hann stóð í – meðal annars við annan ólígarka, Roman Abramovits, eiganda Chelsea. Sagt er að nýskeð hafi hann verið að reyna að selja mynd sem Andy Warhol gerði af Lenín – myndin er þó ekki talin vera nema að hámarki 75 þúsund punda virði. Slíkt fé hefði verið smáaurar fyrir Berezovskí á mestu veltiárunum.

Það má svo rifja að Berezovskí kom í viðtal á Sky-sjónvarpsstöðinni snemma árs 2009. Þar sagði hann meðal annars að Ísland hefði verið notað til að þvo illa fengið fé frá Rússlandi.