Hátíðin HönnunarMars er búin að festa sig í sessi hér á Íslandi – hún er haldin á tíma þegar fer að koma smá vorfiðringur í mann.

Hátíðin lyftir bæjarbragnum og beinir sjónum okkar að hlutum sem eru mikilvægir – hvernig við getum notað hugvitið til að skapa hluti sem hafa notagildi eða eru fallegir og skemmtilegir – jú, og verðmætir.

Því hönnun getur verið afskaplega margvísleg. Hún er náttúrlega allt í kringum okkur. Flestallir hlutir í umhverfi okkar eiga einhvern höfund/hönnuð.

HönnunarMars er farinn að vekja athygli út fyrir landsteinana. Til dæmis skrifar blaðamaðurinn Lars Hedebo Olsen í danska stórblaðið Politiken og segir að þótt Íslendingar séu frægari fyrir tónlist og sýsl kringum furðulegar fjárfestingar, þá séu þeir að sýna umheiminum að þeir kunni sitthvað annað. Það sé mjög skemmtilegt hvernig menningarstofnanir, búðir og veitingahús, já bæjarlífið sé innstillt á hönnun þessa daga – að ógleymdum forsetanum og ráðherrum.

Blaðamaðurinn segir að dönsk hönnun sé vissulega þekktari en íslensk, en þarna hafi Íslendingar fundið skemmtilega leið til að beina athyglinni að hönnun og lyfta henni upp – hann spyr hvort Danir gætu lært af þessu og jafnvel haldið sinn eigin HönnunarMars?

Heimasíða HönnunarMars.