Guðmundur Steingrímsson átti líklega bestu ræðu kvöldsins í eldhúsdagsumræðum. Einfaldlega vegna þess að hann talaði blaðlaust og reyndi að ná beint til áhorfenda.

En um leið átti hann flatneskjulegasta frasann – það var þegar hann fór að vitna í Mary Poppins.

Eldhúsdagsumræðurnar einkenndust annars af taugaveiklun vegna komandi kosninga.

Mikið uppnám ríkir í Sjálfstæðisflokki og Samfylkingu vegna afleits gengis í skoðanakönnunum.

Sjálfstæðismenn þurfa að sækja á Framsóknarmenn og reyna að sannfæra kjósendur um að hugmyndir þeirra um verðtrygginguna séu óraunhæfar. En það er eins og botninn hafi dottið úr þessu öllu hjá Sjálfstæðisflokknum eftir landsfundinn.

Framsókn mun þurfa að verjast talsvert á næstunni – hún verður aftur og aftur krafin svara um hvernig hún ætli að fara að þessu. Það er næðingsamt á toppnum, þegar fylgið nálgast fjórðung af kjósendum.

Samfylkingin er svo búin að tapa helmingnum af fylgi sínu til Bjartrar framtíðar. Það er erfitt fyrir hana að ná taki á Bjartri framtíð – enda er stefna flokkanna ákaflega svipuð, útgáfa Bjartrar framtíðar er bara aðeins poppaðri.

Samfylkingin fékk 29,8 prósenta fylgi í kosningunum 2009, í nýjustu skoðanakönnun er fylgið 12,4 prósent. Það gæti ef til vill stefnt í Íslandsmet í fylgishruni hjá flokknum, stærra en hjá Sjálfstæðisflokknum milli kosninganna 2007 og 2009.