Það er starf Þorsteins Víglundssonar, fræmkvæmdastjóra Samtaka atvinnulífsins, að koma í veg fyrir að atvinnurekendur þurfi að leggja út meiri peninga. Eða þannig hefur ætíð verið litið á þetta djobb. Ef launahækkanir ber á góma mun maðurinn sem gegnir þessari stöðu alltaf segja að þær komi eiginlega alls ekki til greina.

Hugsalega gæti þó verið ákveðin skammsýni þarna á ferðinni. Sum fyrirtæki hafa ekki efni á að borga hærri laun, en önnur hafa það – og launaskrið er eins og endranær mest í fjármálafyrirtækjum og hjá forstjórum. En þannig er ástatt fyrir hagkerfinu að því verður varla komið á almennilega hreyfingu nema laun hækki almennt.

Helsta skýring þess að hagvöxtur á árinu er miklu minni en spáð var er sú að fólk er einfaldlega blankt – það hefur ekki peninga til að eyða, heldur að sér höndum. Það kemur ekkert á óvart að jólaverslun hafi verið heldur dræm. Margir fara reyndar framhjá íslenska kerfinu með því að kaupa hræódýrar vörur í kínverskum vefverslunum. Það á bara eftir að vaxa.

En Þorsteinn Víglundsson hefur þá skýringu á því að hagur launþega batni ekki að háir skattar hindri efnahagsbatann. Það er athyglisverð kenning. Þorsteinn heldur því fram að engin hægræðing hafi orðið í ríkisrekstrinum.

Þorsteinn virðist, frómt frá sagt, vera að fara þess á leit að ríkið borgi að einhverju leyti fyrir næstu kjarasamninga með því að lækka skatta.

Tvíeykið sem virðist hafa smollið algjörlega saman í fjárlaganefnd og fær að ráða furðu miklu í þessu landi, Vigdís Hauksdóttir og Guðlaugur Þór Þórðarson, grípur þetta á lofti.

Guðlaugur segir að þurfi að ganga miklu lengra í að hagræða og forgangsraða í ríkisrekstrinum, en Vigdís segir að „kerfið verji sig með kjafti og klóm“ og noti fjölmiðla óspart í því skyni.

Hvað á Vigdís þar við? Fréttir af vandræðunum í heilbrigðiskerfinu? Jú, vissulega hafa þær verið yfirgnæfandi síðasta árið, en kann það að vera vegna þess að allur almenningur kærir sig ekki um niðurskurð í heilbrigðiskerfinu og vill ekki lækka skatta ef þetta er fórnarkostnaðurinn?

Eitt helsta hlutverk fjölmiðla er að skoða athafnir stjórnvalda og sjá hvernig þær standast gagnrýni. Þess vegna er nauðsynlegt að hafa sterka fjölmiðla.